Khat...

By- Mahima Rabia

Ird-gird zamaana khada tha.
Kuch ankahe sawaal liye
mera nazraana wahin pada tha.
Kamre ki mez par
aap hi ke liye ek tohfa sajaa tha.
Wo deewarein jo thi na,
wo kuch keh rahi thi.
Shaayad sirf aap se,
aap hi se kehna chaah rahi thi -
ke un salaakhon me kabhi waapas na lautna,
jisne har dafaa tha mujhse bahut kuch chheena.
Us kamre ko na tatolna.
Kahin kuch haath na lag jaaye!
Ek saade, suljhe se panne par
kuch kaale se aksharon me bayaan
kisi kahaani ka pataa na chal jaaye!

Aaj is janaaze par
har koi aansoo bahaa raha hai.
Chhota jo hai ye janaaza,
shaayad yahi wajah hai
jo is roz-marra ki kahaani ko
khaas bana raha hai.
Aaj kafan ka kapda bhi
kuch chhota hi katega.
Aaj zameen ka hissa bhi
chhota sa hi,
par thoda zyada royega.

Aadat hai akhbaar ke panno ko
aisi surkhiyaan
har roz apne andar samaane ki.
Kya karoon Maa!
Anjaan thi mai.
Kahaani se,
is zamaane ki.
Wo aakhri tohfa,
wahin pada hoga Maa.
Us khat ki or
ek dafaa dekh lena.
Mera vartmaan na sahi,
us panne me
meri miti hui pehchaan zaroor dhoondh lena.